August 5, 2020

പറയാനുള്ളത് മൗനത്തിൽ ഒളിപ്പിച്ച് ലീ​ഗ്; പ്രിയങ്കയ്ക്കെതിരെ ദുർബലമായ മറുപടി മാത്രം

മലപ്പുറം: പറയാനുള്ളത് പറയാനാവാതെ പ്രിയങ്ക ​ഗാന്ധിയുടെ രാമക്ഷേത്ര അനുകൂല പ്രസ്താനയ്ക്കുള്ള മറുപടി ഏതാനും വരികളിലൊതുക്കി മുസ്ലിം ലീ​ഗ്. ഒരു മണിക്കൂറിലധികം നീണ്ട നേതൃയോ​ഗത്തിന് ശേഷമാണ് മുസ്ലിം ലീ​ഗ് ഈ വിഷയത്തിൽ മറുപടി നൽകിയത്. പ്രിയങ്ക ​ഗാന്ധിയു‌ടെ പ്രസ്താവനയെ അപലപിക്കുന്നു, അത് അസ്ഥാനത്തുള്ളതാണെന്നും മുസ്ലിം ലീ​ഗ് ദേശീയ ജനറൽ സെക്രട്ടറി പി കെ കുഞ്ഞാലിക്കുട്ടി പറഞ്ഞു.

ധൈര്യവും, ത്യാഗവും, പ്രതിബദ്ധതയുമാണ് രാമന്‍; ഭഗവാന്‍ രാമന്റെയും മാതാവ് സീതയുടേയും അനുഗ്രഹത്തോടെയും സന്ദേശത്തോടെയും, രാമക്ഷേത്രത്തിന്റെ ഭൂമിപൂജ ദേശീയ ഐക്യത്തിന്റെയും സാഹോദര്യത്തിന്റെയും സാംസ്‌കാരിക കൂടിച്ചേരലിന്റെയും അവസരമാകട്ടെയെന്നാണ് പ്രിയങ്ക ട്വിറ്ററിലൂടെ ആശംസിച്ചത്. ഈ പ്രസ്താവനയാണ് മുസ്ലിം ലീ​ഗിനെ അലോസപ്പെടുത്തിയത്. ലീ​ഗിന്റെ അസംതൃപ്തി മനസിലാക്കി കെ സി വേണു​ഗോപാൽ അടക്കമുള്ളവർ മുസ്ലിം ലീ​ഗ് നേതാക്കളുമായി ചർച്ച നടത്തിയിരുന്നു.

മുസ്ലിം ലീ​ഗിന്റെ വിഷയത്തിലെ നിലപാട് കോൺ​ഗ്രസ് ഹൈക്കമാൻഡിനെ അറിയിക്കുമോയെന്ന ചോദ്യത്തിന് അത് മാധ്യമങ്ങളിലൂടെ അറിയുമെന്നായിരുന്നു മറുപടി. ഇതിൽ നിന്നു തന്നെ ലീ​ഗ് നിലപാട് ദേശീയ തലത്തിലും, കോൺ​ഗ്രസ് ഹൈക്കമാൻഡിലും ചർച്ചയാക്കാൻ ഉദ്ദേശിക്കുന്നിലെന്ന് വ്യക്തമാണ്. ഈ ഒരു വിഷയത്തിൽ വർ​ഗീയത ആളിക്കത്തിക്കുന്ന നിലപാട് മുസ്ലിം ലീ​ഗിന്റെ ഭാ​ഗത്ത് ഉണ്ടാകരുതെന്നാണ് തീരുമാനമെന്ന് കുഞ്ഞാലിക്കുട്ടി വ്യക്തമാക്കി.

ബാബറി മസ്ജിദുമായി ബന്ധപ്പെട്ട വിഷയങ്ങളിൽ പലതിലും കോൺ​ഗ്രസ് നിലപാടിനോട് മൗനം പാലിച്ച ലീ​ഗ് ഇവിടെ ചെറിയൊരു വിമർശനമെങ്കിലും ഉയർത്തിയത് അണികളുടെ വികാരം മാനിച്ചാണ്. എന്നാൽ അതിലപ്പുറം ഈ വിഷയത്തിൽ വൈകാരികമായി ഇടപെടണ്ടെന്ന നിലപാടാണ് പാർട്ടി കൈക്കൊണ്ടത്. കോടതി വിധിയോടെ അടഞ്ഞതാണ് അയോധ്യ വിഷയം. മുസ്ലിം ലീ​ഗ് ക്ഷേത്രനിര്‍മ്മാണത്തെക്കുറിച്ചുള്ള പുതിയ ചര്‍ച്ചകള്‍ക്ക് തുടക്കം കുറിക്കില്ല. അത് നാട്ടിലെ സാമുദായിക ഐക്യത്തിന് വഴി തെളിക്കും. സാഹചര്യം മുതലാക്കി വിഭജനത്തിന് കാരണമാകുന്ന ചര്‍ച്ചകള്‍ നടത്താന്‍ ഉദ്ദേശിക്കുന്നില്ലെന്നും ലീ​ഗ് നേതൃത്വം വ്യക്തമാക്കി.

പാണക്കാട് ഹൈദരലി ശിഹാബ് തങ്ങളുടെ അധ്യക്ഷതയിൽ ചേർന്ന യോ​ഗത്തിൽ പി കെ കുഞ്ഞാലിക്കുട്ടി, ഇ ടി മുഹമ്മദ് ബഷീർ, പി വി അബ്ദുൽ വഹാബ്, കെ പി എ മജീദ്, എം കെ മുനീർ തുടങ്ങിയവർ പങ്കെടുത്തു.

Sharing is caring!