അര്ജന്റീന ഫുട്ബോള് ടീം 2025ല് കേരളത്തിലെത്തും, കളിക്കുക രണ്ട് സൗഹൃദ മത്സരം
മലപ്പുറം: 2025 ഒക്ടോബര് മാസം അര്ജന്റീന ദേശീയ ടീം കേരളത്തില് കളിക്കാന് സന്നദ്ധത അറിയിച്ചതായി കായിക മന്ത്രി വി അബ്ദുറഹിമാന്. അര്ജന്റിന ഫുട്ബോള് അസോസിയേഷന് പ്രതിനിധികളുമായി ഇന്ന് നടന്ന ഓണ്ലൈന് മീറ്റിംഗിലാണ് തീരുമാനം. ഇതോടൊപ്പം കേരള സര്ക്കാരിന്റെ ഗോള് പദ്ധതിയുമായി സഹകരിച്ച് 5,000 കുട്ടികളെ പരിശീലിപ്പിക്കുവാനും അര്ജന്റീന ഫുട്ബോള് അസോസിയേഷന് താല്പര്യം അറിയിച്ചതായി മന്ത്രി പറഞ്ഞു.
അര്ജന്റീന ദേശീയ ടീം കേരളത്തില് രണ്ട് സൗഹൃദ മത്സരം കളിക്കും. നേരത്തേ 2024 ജൂണില് കളിക്കാന് എത്തുമെന്നാണ് അറിയിച്ചത്. എന്നാല്, ആ സമയം മണ്സൂണ് സീസണായതിനാല് പ്രയാസം അറിയിച്ചു. തുടര്ന്നാണ് 2025 ഒക്ടോബറിലേക്ക് മത്സരം മാറ്റിയത്.
മന്ത്രിയുടെ ഫേസ്ബുക്ക് കുറിപ്പിന്റെ പൂര്ണരൂപം
ലിയോണല് മെസ്സി അടക്കമുള്ള അര്ജെന്റീന ദേശീയ ടീം ഇന്ത്യയില് കളിക്കാന് ആഗ്രഹം പ്രകടിപ്പിച്ചെങ്കിലും ഭീമമായ ചിലവ് താങ്ങാന് കഴിയില്ലെന്ന കാരണത്താല് ഇന്ത്യ ആ അവസരം നഷ്ടപ്പെടുത്തി എന്ന വാര്ത്ത കേരളത്തിലെ ഫുട്ബാള് പ്രേമികളില് പ്രത്യേകിച്ചും നീലപ്പടയുടെ ആരാധകരില് സൃഷ്ടിച്ച നിരാശയാണ് അര്ജെന്റിന ടീമിനെ കേരളത്തിലേക്ക് ക്ഷണിക്കാന് പ്രേരകമായത്. ഖത്തര് ലോകക്കപ്പ് സമയത്ത് കേരളത്തെ നീലക്കടലാക്കി മാറ്റിയ കേരളത്തോടുള്ള ഇഷ്ടം പ്രകടിപ്പിച്ചു കൊണ്ട് കേരളത്തിന്റെ ക്ഷണം അവര് സ്വീകരിച്ചു.
നമ്മുടെ ടീമുമായുള്ള സൗഹൃദ മത്സരത്തിന്റെ സാധ്യതകളും കേരളത്തിന്റെ ഫുട്ബോള് വികസനത്തില് അര്ജെന്റിനയുമായി സഹകരിക്കാവുന്ന വിവിധ തലങ്ങളും അര്ജെന്റിന ഫുട്ബോള് അസോസിയേഷന് പ്രതിനിധികളുമായി ഇന്ന് നടന്ന ഓണ്ലൈന് മീറ്റിംഗില് വിശദമായി ചര്ച്ച ചെയ്യപ്പെട്ടു.
അര്ജന്റിന കേരളവുമായി ഫുട്ബോള് രംഗത്ത് സജീവമായ സഹകരണത്തിന് സന്നദ്ധത അറിയിച്ചു. കേരള സര്ക്കാര് നടത്തുന്ന ഗോള് പരിശീലന പദ്ധതിയുമായി സഹകരിക്കാനും 5000 കുട്ടികളെ പരിശീലിപ്പിക്കുവാനും ഉള്ള താത്പര്യവും അവര് പ്രകടിപ്പിച്ചിട്ടുണ്ട്.
അര്ജന്റീന ദേശീയ ടീം കേരളത്തില് രണ്ട് സൗഹൃദ മത്സരം കളിക്കും. നേരത്തേ 2024 ജൂണില് കളിക്കാന് എത്തുമെന്നാണ് അറിയിച്ചത്. എന്നാല്, ആ സമയം മണ്സൂണ് സീസണായതിനാല് പ്രയാസം അറിയിച്ചു. തുടര്ന്ന് 2025 ഒക്ടോബറില് കളിക്കാന് സന്നദ്ധത അര്ജന്റീന അറിയിച്ചു.
ഏറെ ശ്രമകരമായ ഒന്നാകും ഈ സൗഹൃദ മത്സരത്തിന്റെ സംഘാടനം എങ്കിലും കേരളത്തിലെ ഫുട്ബോള് പ്രേമികള്ക്ക് നല്കാവുന്ന വലിയ സമ്മാനവും ഒപ്പം നമ്മുടെ കായിക താരങ്ങള്ക്ക് ഉള്ള വലിയ പ്രചോദനവും ആകും അര്ജെന്റിന ദേശീയ ടീമിന്റെ കേരളത്തിലേക്കുള്ള വരവ് എന്ന വിശ്വാസവും തിരിച്ചറിവും ഈ വാര്ത്ത വന്നപ്പോള് മുതല് നമ്മുടെ ആളുകള് പ്രകടിപ്പിക്കുന്ന ആവേശവും
മുന്നോട്ട് പോകുവാന് പ്രേരിപ്പിക്കുന്ന ഒന്നാണ്.
അര്ജെന്റീന ദേശീയ ടീമിന്റെ ഇന്റര്നാഷണല് റിലേഷന്സ് ഹെഡ് പാബ്ലോ ഡയസ് സംസ്ഥാന കായിക വകുപ്പ് സെക്രട്ടറി പ്രണബ് ജ്യോതിനാഥ് ഐ എ എസ് കെ എഫ് എ സംസ്ഥാന പ്രസിഡന്റ് നവാസ് മീരാന് അടക്കമുള്ള പ്രതിനിധികള് ചര്ച്ചയില് പങ്കെടുത്തു.
RECENT NEWS
ഓൺലൈൻ തട്ടിപ്പ് കേസിലെ പ്രതിയെ 40,000 സിമ്മുകളുമായി മലപ്പുറം പോലീസ് പിടികൂടി
മലപ്പുറം: ഒരു കോടി എട്ട് ലക്ഷം രൂപ തട്ടിയെടുത്ത ഓൺലൈൻ ട്രേഡിംഗ് തട്ടിപ്പിലെ മുഖ്യ കണ്ണികളിൽ ഒരാളെ പിടികൂടി മലപ്പുറം പോലീസ്. കർണാടകയിലെ മടിക്കേരിയിൽ നിന്നാണ് തട്ടിപ്പിന് ആവശ്യമായ സിം കാർഡുകൾ എടുത്ത് നൽകിയ അബ്ദുൾ റോഷനെ (46) മലപ്പുറം സൈബർ ക്രൈം [...]