സ്‌കൂള്‍ വിദ്യാര്‍ഥികള്‍ക്കായി സ്പെഷ്യല്‍ കഞ്ചാവ് പാക്കറ്റ് പൊതി; 12 പേര്‍ പരപ്പനങ്ങാടിയില്‍ പിടിയില്‍
മലപ്പുറം: സ്‌കൂള്‍ വിദ്യാര്‍ഥികള്‍ക്കായി സ്പെഷ്യല്‍ കഞ്ചാവ് പാക്കറ്റ് പൊതി ഒന്നിന് 500രൂപ മുതല്‍ വില്‍പന നടത്തിയ കഞ്ചാവ് വില്‍പനക്കാരും ഉപയോഗിച്ചവരുമടക്കം 14കാരന്‍ ഉള്‍പ്പെടെ 12 പേര്‍ പരപ്പനങ്ങാടിയില്‍ പോലീസ് പിടിയില്‍. പരപ്പനങ്ങാടിയിലെ പൊതുസ്ഥലങ്ങളിലും ബീച്ചുകളും കേന്ദ്രീകരിച്ച് കഞ്ചാവിന്റെ വില്‍പനയും ഉപയോഗവും നടക്കുന്നതായുള്ള വിവരത്തിന്റെ അടിസ്ഥാനത്തില്‍ നടത്തിയ റെയ്ഡിലാണ് പ്രായപൂര്‍ത്തിയാകാത്ത ഒരു സ്‌കൂള്‍ വിദ്യാര്‍ഥി ഉള്‍പ്പെടെ 12 പേര്‍ പിടിയിലായത്. ഇതില്‍ രണ്ടു പേര്‍ കഞ്ചാവ് കച്ചവടക്കാരും 10 പേര്‍ ഉപയോഗിച്ചവരുമാണ്. ജോഷി (48) ,പ്രിയദര്‍ശിനി ഹൗസ്, വള്ളിക്കുന്ന് നോര്‍ത്ത് , ഷെഫീഖ് (35), വടക്കില്‍ ഹൗസ്, ഹരിജന്‍ കോളനി, ആനങ്ങാടി എന്നിവരെയാണ് ചഇ ഗാര്‍ഡന് പുറകു വശം ബീച്ചിലും താലപ്പൊലിപ്പറമ്പിന് സമീപത്ത് വച്ചും കഞ്ചാവ് കച്ചവടം നടത്തിയതിന് പരപ്പനങ്ങാടി പോലീസ് അറസ്റ്റ് ചെയ്തത്. ഷെഫീഖിന്റെ പേരില്‍ നിലവില്‍ 3 കേസുകള്‍ നിലവിലുണ്ട്. താലപ്പൊലിപ്പറമ്പിന് സമീപമായുള്ള വീട്ടില്‍ വച്ചാണ് ജോഷി കഞ്ചാവ് കച്ചവടം നടത്തിയിരുന്നത്. പൊതി ഒന്നിന് 500 രൂപ മുതല്‍ മുകളിലേക്കാണ് വില. താലെപ്പൊലിപ്പറമ്പില്‍ വൈകിട്ട് വരുന്ന സ്‌കൂള്‍ കുട്ടികള്‍ അടക്കമുള്ള ചെറുപ്പക്കാര്‍ക്കാണ് ആണ് ഇയാള്‍ കഞ്ചാവ് വിറ്റിരുന്നത്. വള്ളിക്കുന്ന് റെയില്‍വേ അണ്ടര്‍ പാസിന് സമീപത്ത് നിന്നും, ചെട്ടിപ്പടി റെയില്‍വേ ഗേറ്റിന് സമീപത്ത് നിന്നും ഉഷാ നേഴ്സറി, പരപ്പനങ്ങാടി പുത്തരിക്കല്‍ , മുനിസിപ്പല്‍ ഫിഷ്മാര്‍ക്കറ്റ്, അഞ്ചപ്പുര എന്നിവിടങ്ങള്‍ കേന്ദ്രീകരിച്ച് നടത്തിയ പരിശോധനയിലാണ് പ്രായപൂര്‍ത്തിയാകാത്ത സ്‌കൂള്‍ കുട്ടി ഉള്‍പ്പെടെ 10 പേരെ പോലീസ് അറസ്റ്റ് ചെയ്തത്. അരിയല്ലൂര്‍ കരുമരക്കാട് സ്വദേശിയായ അമല്‍ ബാജി, കടലുണ്ടി നഗരം സ്വദേശികളായ
അജീഷ്, ഹാഷിം അന്‍വര്‍ ,ഷഹദ്, അരിയല്ലൂര്‍ സ്വദേശിയായ നബീല്‍ ചുടലപ്പറമ്പ് സ്വദേശിയായ മുഹമ്മദ് അലി , പരപ്പനങ്ങാടി സ്വദേശികളായ അബൂബക്കര്‍ സിദ്ദിഖ്, ഷാഹുല്‍ , വള്ളിക്കുന്ന് അത്താണിക്കല്‍ സ്വദേശിയായ 14 വയസ് ഉള്ള സ്‌കൂള്‍ കുട്ടി എന്നിവരെയാണ് കഞ്ചാവ് ഉപയോഗത്തിനിടെ പോലീസ് അറസ്റ്റ് ചെയ്തത്. കഞ്ചാവ് കച്ചവടം ചെയ്ത കേസില്‍ പ്രതികള്‍ക്ക് 2 വര്‍ഷം തടവും പിഴയും ശിക്ഷയായി ലഭിക്കും. കഞ്ചാവ് ഉപയോഗിച്ചാല്‍ നിലവില്‍ ഒരു വര്‍ഷം തടവും പിഴയും ലഭിക്കുന്നതാണ്. പരപ്പനങ്ങാടി സിഐ ഹണി കെ.ദാസ്, എസ് ഐ മാരായ പ്രദീപ് കുമാര്‍, ബാബുരാജ്, പരമേശ്വരന്‍ , പോലീസുകാരായ പ്രീത, മഹേഷ്, പ്രബീഷ് ,സനല്‍, ദിലീപ് താനൂര്‍ സബ് ഡിവിഷന്‍ ഡാന്‍സാഫ് ടീമംഗങ്ങളായ ആല്‍ബിന്‍ , വിപിന്‍, ജിനേഷ്, സബറുദീന്‍, അഭിമന്യു എന്നിവരുടെ നേതൃത്വത്തിലാണ് പരിശോധന നടന്നത്. വരും ദിവസങ്ങളിലും കര്‍ശനമായ പരിശോധന ഉണ്ടാകുമെന്ന് പരപ്പനങ്ങാടി പോലീസ് അറിയിച്ചു.
RECENT NEWS
ലീഗിന്റെ സമുദായ വഞ്ചനയ്ക്ക് തിരഞ്ഞെടുപ്പിലൂടെ ജനം മറുപടി നൽകുമെന്ന് കെ എസ് ഹംസ
തിരൂരങ്ങാടി: മുസ്ലിം സമുദായത്തെ ലീഗ് വഞ്ചിച്ചത് 14 തവണയാണെന്നും സമുദായ വഞ്ചനയ്ക്ക് ലോക്സഭാ തെരഞ്ഞെടുപ്പിലൂടെ ജനം മറുപടി നല്കുമെന്നും പൊന്നാനിയിലെ എല്.ഡി.എഫ് സ്ഥാനാര്ത്ഥി കെ.എസ് ഹംസ. തിരൂരങ്ങാടി നിയമസഭാ മണ്ഡലത്തിലെ വിവിധ പര്യടനകേന്ദ്രങ്ങളില് [...]
