July 9, 2023

മമ്പാട് എട്ടു വയസുകാരിക്ക് തെരുവ് നായ ആക്രമണത്തിൽ പരുക്ക്

നിലമ്പൂർ: മമ്പാട് പാലപറമ്പിൽ തെരുവുനായകളുടെ ആക്രമണത്തിൽ എട്ടു വയസുകാരന് പരിക്ക്. എമർജൻസി റെസ്ക്യു ഫോഴ്സ് അംഗം ഡെനി എബ്രാഹാമിന്‍റെ മകൻ ജോയൽ (8) നെയാണ് മമ്പാട് പാലാപറമ്പിലെ വീടിന്‍റെ മുറ്റത്തിട്ട് അഞ്ച് തെരുവുനായകൾ ആക്രമിച്ചത്. ഇന്നലെ വൈകുന്നേരം നാലോടെയാണ് സംഭവം. കുട്ടി സ്കൂൾ ബസിറങ്ങി വീട്ടിലേക്ക് വരുന്നതിനിടെ അഞ്ച് തെരുവുനായകൾ കൂട്ടമായി കുട്ടിയെ ആക്രമിക്കുകയായിരുന്നു.

നിലവിളി കേട്ട് എത്തിയ അമ്മയാണ് തെരുവുനായകളെ ഓടിച്ച് കുട്ടിയെ രക്ഷപ്പെടുത്തിയത്. തുടർന്ന് ഉടൻതന്നെ കുട്ടിയെ നിലമ്പൂർ ജില്ലാ ആശുപത്രിയിൽ പ്രവേശിപ്പിക്കുകയായിരുന്നു. കുട്ടിക്ക് വാക്സിൻ ഉൾപ്പെടെയുള്ള ചികിത്സ നൽകി. കുട്ടിയുടെ കാൽ മടക്കിന് മുകളിലായാണ് നായയുടെ കടിയേറ്റത്.
പനി ബാധിച്ച് മലപ്പുറത്തെ ഒമ്പതു വയസുകാരി മരിച്ചു
എന്നാൽ, പ്രദേശത്ത് തെരുവുനായകളുടെ ശല്യം രൂക്ഷമായി തുടരുകയാണ്. എന്നിട്ടും അധികൃതർ പ്രതിരോധ നടപടി സ്വീകരിക്കാത്തതിൽ പ്രതിഷേധം ശക്തമാണ്. പുല്ലോട് എഎൽപി സ്കൂൾ വിദ്യാർഥിയാണ് ജോയൽ.

അതേസമയം മലപ്പുറം ജില്ലയിൽ കുട്ടികൾക്ക് നേരെ തെരുവുനായ ആക്രമണം തുടരുകയാണ്. കഴിഞ്ഞദിവസം തിരൂരങ്ങാടിയിലും പെരുന്നാൾ ദിവസം കുട്ടികളെ ആക്രമിച്ചിരുന്നു. ഇതിനു പിന്നാലെയാണ് മമ്പാട് എട്ടു വയസുകാരന് നേരെ തെരുവുനായുടെ ആക്രമണം ഉണ്ടായത്. ഇത്രയൊക്കെ ആക്രമണങ്ങൾ ഉണ്ടായിട്ടും ഇതുതടയാൻ അധികൃത ഭാഗത്തിന് ഒരു തരത്തിലുള്ള നടപടിയും ഉണ്ടാകുന്നില്ല. ഇതിൽ വലിയ രീതിയിലുള്ള പ്രതിഷേധങ്ങളാണ് ഇപ്പോൾ ഉയർന്നുവരുന്നത്.

Sharing is caring!