പ്രവാസികളുടെ തിരിച്ചു പോക്ക് അസാധ്യമായി തീർന്ന പ്രതിസന്ധി പരിഹരിക്കുന്നതിന് കേരളത്തിൽ നിന്നുള്ള മന്ത്രിതല ദൗത്യ സംഘം കേന്ദ്ര ഗവണ്മെന്റിനെ കാണണമെന്ന് ഇ. ടി മുഹമ്മദ്‌ ബഷീർ എം. പി

.  ഇന്ന് മുഖ്യമന്ത്രി വിളിച്ചു ചേർത്ത എം.പിമാരുടെ വീഡിയോ കോൺഫ്രൻസിൽ സംസാരിക്കുകയായിരുന്നു അദ്ദേഹം.  പ്രവാസികൾ നാട്ടിലും മറു നാട്ടിലും  വഴി മുട്ടി നിന്ന സാഹചര്യത്തിൽ യാത്രക്കനുകൂലമായ ചില പ്രതീക്ഷകൾ ഉയർന്നുവന്നെങ്കിലും സാഹചര്യങ്ങൾ  വീണ്ടും പ്രതികൂലമായി.  വിമാന കമ്പനികൾ തങ്ങളുടെ അന്താരാഷ്ട്ര ഗതാഗതം  നിർത്തിവെച്ചെന്നുള്ള  അറിയിപ്പിനെ തുടർന്ന് വീണ്ടും സങ്കീർണമായിരിക്കുകയാണ്. ഇതിനകം തന്നെ പലരുടേയും ജോലി നഷ്ടപ്പെട്ടു കഴിഞ്ഞു. അവരുടെ കുടുംബങ്ങൾ തന്നെ പട്ടിണിയിലായി. ഇക്കാര്യത്തിൽ ഗവണ്മെന്റ് ചെയ്യുന്ന പരിശ്രമങ്ങളുടെ കൂടെ കേരളത്തിലെ എല്ലാ എം.പിമാരും ഉണ്ടാകുമെന്നും അദ്ദേഹം പറഞ്ഞു.

അന്താരാഷ്ട്ര തലത്തിൽ കോവാക്സിനു   അംഗീകാരമില്ലാത്തതിന്റെ ഫലമായി യാത്രക്കാർക്ക് വലിയ പ്രയാസങ്ങൾ നേരിടുന്നുണ്ട്. ഇക്കാര്യം ശാസ്ത്ര,  സാങ്കേതിക വകുപ്പിന്റെ പാർലിമെന്ററി സ്റ്റാന്റിംഗ് കമ്മിറ്റിയിൽ താൻ നേരത്തെ ചൂണ്ടിക്കാണിച്ചിരുന്നുവെന്ന് എം. പി പറഞ്ഞു. ഇക്കാര്യത്തിൽ ഉടനെ ഗവണ്മെന്റ് ഇടപെടണമെന്നും എം.പി പറഞ്ഞു. ലക്ഷദ്വീപിൽ നടക്കുന്ന ഫാഷിസ്റ്റ് ക്രൂരതകൾക്ക് നേരെ ശക്തമായി  ഇടപെടേണ്ട ബാധ്യത കേരളത്തിനു  മൊത്തത്തിലും സർക്കാരിന് വിശേഷിച്ചും ഉണ്ട്. അവർ നമ്മുടെ ഹൃദയത്തിന്റെ ഭാഗമാണെന്നും എംപി ചൂണ്ടിക്കാട്ടി. കരിപ്പൂർ വിമാനത്താവളത്തിൽ ഭൗതിക സൗകര്യങ്ങളുടെ വികസനം നടന്നിട്ടില്ലെങ്കിൽ അത്‌ കാലക്രമേണ ശോഷിച്ചു ഇല്ലാതാകുമെന്നും സർക്കാറിനും ജനങ്ങൾക്കും ഇക്കാര്യത്തിൽ നിശ്ചയദാർഢ്യം ഉണ്ടാവണമെന്നും എം. പി പറഞ്ഞു.