യാത്രയ്ക്കിടെ ലോറി ഡ്രൈവര്‍ക്ക് നെഞ്ചുവേദന: യുവാക്കള്‍ രക്ഷകരായി

യാത്രയ്ക്കിടെ ലോറി ഡ്രൈവര്‍ക്ക് നെഞ്ചുവേദന: യുവാക്കള്‍ രക്ഷകരായി

തിരൂരങ്ങാടി: യാത്രയ്ക്കിടെ നെഞ്ചുവേദന അനുഭവപ്പെട്ട ഡ്രൈവരെ ഉടന്‍ ആശുപത്രിയിലെത്തിച്ച് യുവാക്കള്‍ രക്ഷകരായി. തൃശ്ശൂര്‍ ജെറുസലേം സ്വദേശിയായ ഡ്രൈവര്‍ കൊച്ചന്‍വീട്ടില്‍ വിനു (37) വിനാണ് കുന്നംകുളത്ത് നിന്ന് മിനിലോറിയില്‍ റെക്‌സിന്‍ ഷീറ്റുമായി താമരശ്ശേരിയിലേക്ക് പോകുംവഴി കക്കാട് വെച്ച് നെഞ്ചുവേദന അനുഭവപ്പെട്ടത്. തുടര്‍ന്ന് കക്കാട് സ്വദേശിയായ വട്ടപറമ്പന്‍ അബ്ദുല്‍ റഷീദിനോട് ആശുപത്രിലേക്കുള്ള വഴി ചോദിക്കുകയും, വാഹനം ഓടിക്കാനുള്ള പ്രയാസവും മുമ്പ് ഹൃദയാഘാതം ഉണ്ടായിരുന്നതായും ഡ്രൈവര്‍ അറിയിക്കുകയായിരുന്നു. ഉടനെ അബ്ദുല്‍റഷീദ് കക്കാട് ട്രോമാകെയര്‍ പ്രവര്‍ത്തകനായ ഫൈസല്‍ താണിക്കലിനെ വിളിക്കുകയും ഇരുവരും ചേര്‍ന്ന് തൊട്ടടുത്തുള്ള സ്വകാര്യ ആശുപത്രിയില്‍ എത്തിച്ച് അടിയന്തര ചികിത്സ നല്‍കി. ബന്ധുക്കളെ വിവരമറിയിക്കുകയും ചെയ്തു. സംഭവം സോഷ്യല്‍ മീഡിയ വഴി വിവരമറിഞ്ഞ് മോട്ടോര്‍ വാഹന വകുപ്പ് എന്‍ഫോഴ്‌സ്‌മെന്റ് വിഭാഗം മോട്ടോര്‍ വെഹിക്കിള്‍ ഇന്‍സ്‌പെക്ടര്‍ പി.കെ. മുഹമ്മദ് ഷഫീഖ്, എ.എം.വി. മാരായ പി.ഐ. മുഹമ്മദ് ലബീബ്, അഭിന്‍ ചാക്കോ എന്നിവരുടെ നേതൃത്വത്തില്‍
വീട്ടിലെത്തി അബ്ദുല്‍ റഷീദിനെയും ഫെസല്‍ താണിക്കലിനെയും അഭിനന്ദിച്ചു. .
ഡ്രൈവറുടെ ജീവന്‍ രക്ഷിക്കുന്നതിനോടൊപ്പം ലോറി ഡ്രൈവറെ വാഹനമോടിക്കാന്‍ അനുവദിക്കാതെ ആശുപത്രിയില്‍ എത്തിക്കുകവഴി നിരത്തിലെ മറ്റു വാഹനങ്ങള്‍ക്ക് കൂടി സുരക്ഷ ഒരുക്കിയ ഇവരുടെ പ്രവര്‍ത്തനം മാതൃകാപരമാണെന്ന് എന്‍ഫോഴ്‌സ്‌മെന്റ് കണ്‍ട്രോള്‍ റൂം എം.വി.ഐ പി.കെ. മുഹമ്മദ് ഷഫീഖ് പറഞ്ഞു.

 

Sharing is caring!