കോവിഡ് ഭീതിക്കിടയിലും അന്യ സംസ്ഥാനങ്ങളില്‍ നിന്ന് മലപ്പുറത്തേക്ക് വന്‍ കഞ്ചാവ് കടത്ത്. രണ്ടുപേര്‍ പിടിയില്‍

കോവിഡ് ഭീതിക്കിടയിലും  അന്യ സംസ്ഥാനങ്ങളില്‍ നിന്ന്  മലപ്പുറത്തേക്ക് വന്‍ കഞ്ചാവ്  കടത്ത്. രണ്ടുപേര്‍ പിടിയില്‍

മലപ്പുറം: കോവിഡ് ഭീതിക്കിടയിലും അന്യ സംസ്ഥാനങ്ങളില്‍ നിന്ന് ചരക്കുലോറികളിലും പച്ചക്കറി ലോറികളിലും ഒളിപ്പിച്ചു വന്‍ കഞ്ചാവ് കടത്ത്. ശേഷം ചെറുവണ്ടികളിലേക്ക് മാറ്റി കേന്ദ്രങ്ങളിലെത്തിക്കും. ഗുഡ്‌സ് ഓട്ടോയില്‍ പുല്ല് നിറച്ച് അതിനുള്ളില്‍ ഒളിപ്പിച്ച കഞ്ചാവുമായ രണ്ടുപേര്‍ പെരിന്തല്‍മണ്ണയില്‍ പിടിയില്‍. ഗൂഡ്‌സ് ഓട്ടോയിലൊളിപ്പിച്ച 4.200 ഗ്രാം കഞ്ചാവുമായി മണ്ണാര്‍ക്കാട് സ്വദേശികളാണ് ഇന്ന് പിടിയിലായത്. മണ്ണാര്‍ക്കാട് കുന്തിപ്പുഴ സ്വദേശി പൂളോണ വീട്ടില്‍ മുഹമ്മദ് സാദിഖ് (40), കൈതച്ചിറ ത്തേങ്കലം സ്വദേശി സ്രാമ്പിക്കല്‍ അബ്ദുള്‍ ഖാദര്‍(37) എന്നിവരെയാണ് ഗുഡ്‌സ് ഓട്ടോ സഹിതം പെരിന്തല്‍മണ്ണ സിഐ ശശീന്ദ്രന്‍ മേലെയിലും സംഘവും അറസ്റ്റ് ചെയ്തത്.
അന്യ സംസ്ഥാനങ്ങളില്‍ നിന്നും ചരക്കുലോറികളിലും പച്ചക്കറി ലോറികളിലും ഒളിപ്പിച്ചു വന്‍ തോതില്‍ കഞ്ചാവ് അതിര്‍ത്തി ജില്ലകള്‍ വഴി ജില്ലയിലേക്കെത്തുന്നതായി മലപ്പുറം ജിലാ പോലീസ് മേധാവി യു. അബ്ദുള്‍ കരീമിന് ലഭിച്ച രഹസ്യ വിവരം പെരിന്തല്‍മണ്ണ എ.എസ്.പി ഹേമലതക്ക് കൈമാറുകയായിരുന്നു. ജില്ലയിലേക്ക് വരുന്ന ചരക്കുലോറികളും മറ്റും നിരീക്ഷിച്ചു നടത്തിയ അന്വേഷണത്തിലാണ് അന്യ സംസ്ഥാനങ്ങളില്‍ നിന്നും മണ്ണാര്‍ക്കാട്, കോട്ടപ്പുറം ഭാഗങ്ങളിലെ രഹസ്യ കേന്ദ്രങ്ങളിലെത്തിച്ച് ചെറു വാഹനങ്ങളില്‍ വില്‍പ്പനക്കായി പെരിന്തല്‍മണ്ണയിലെത്തിച്ച 4.200 കിലോ ഗ്രാം കഞ്ചാവുമായി വന്ന പ്രതികളെ അറസ്റ്റ് ചെയ്തത്. ഗുഡ്‌സ് ഓട്ടോയില്‍ പുല്ല് നിറച്ച് അതിനുള്ളില്‍ ഒളിപ്പിച്ചാണ് കഞ്ചാവ് കടത്തിയിരുന്നത്.
പ്രതികളെ പെരിന്തല്‍മണ്ണ എ.എസ്.പി. ഹൈമലതയുടെ നേതൃത്വത്തില്‍ ചോദ്യം ചെയ്തതില്‍ ആന്ധ്രയിലെ വിശാഖ പട്ടണത്തു നിന്നും ചരക്കു ലോറികള്‍ വഴി കേരളത്തിലെത്തിച്ചു പ്രത്യേക ഏജന്റുമാര്‍ മുഖേന രഹസ്യ കേന്ദ്രങ്ങളില്‍ സംഭരിച്ചു കിലോ ഗ്രാമിന് അമ്പതിനായിരം രൂപ വരെ വിലക്കാണ് ചെറുകിട വില്‍പ്പനക്കാര്‍ക്ക് കൈമാറുന്നത്. ലോക് ഡൗണിന്റെ മറവില്‍ ചരക്ക് പച്ചക്കറി ലോറികളിലും മത്സ്യം കൊണ്ടുവരുന്ന മിനി കണ്ടെയ്‌നറുകളിലും രഹസ്യ അറകളുണ്ടാക്കിയാണ് കഞ്ചാവ് കേരളത്തിലേക്കെത്തിക്കുന്നത്. നാട്ടിലെത്തിയാല്‍ ഇരട്ടിയിലധികം ലാഭത്തിനാണ് ചെറുകിട കച്ചവടക്കാര്‍ക്ക് വില്‍പ്പന നടത്തുന്നതെന്നും പ്രതികള്‍ പറയുന്നു.
ഇത്തരത്തില്‍ കഞ്ചാവ് കേരളത്തിലേക്ക് കടത്തുന്ന ഇടനിലക്കാരെ കുറിച്ചും വാഹനങ്ങളെ കുറിച്ചുമുള്ള വിവരങ്ങള്‍ ശേഖരിച്ചു വരികയാണെന്നും പെരിന്തല്‍മണ്ണ എഎസ്.പി. ഹേമലത ഐപിഎസ്, സി.ഐ. ശശീന്ദ്രന്‍ മേലെയില്‍ എന്നിവര്‍ അറിയിച്ചു. പെരിന്തല്‍മണ്ണ എ.എസ്.പി ഹേമലത ഐ.പി.എസിന്റെ നേതൃത്വത്തില്‍ സി.ഐ. ശശീന്ദ്രന്‍ മേലെയില്‍, പ്രത്യേക അന്വേഷണ സംഘത്തിലെ സി.പി. മുരളീധരന്‍, ടി. ശ്രീകുമാര്‍, എന്‍.ടി. കൃഷ്ണകുമാര്‍ , എം. മനോജ് കുമാര്‍, കെ. സുകുമാരന്‍, ഫൈസല്‍, വിനീത്, ഷിനോജ്, അനില്‍ ചാക്കോ, പ്രഫുല്‍, മിഥുന്‍ എന്നിവരാണ് സംഘത്തിലുണ്ടായിരുന്നത്.

Sharing is caring!