കരിപ്പൂരില്‍നിന്ന് എയര്‍ഇന്ത്യ ജംബോസര്‍വീസ് ഡിസംബര്‍ 25 മുതല്‍

കരിപ്പൂരില്‍നിന്ന് എയര്‍ഇന്ത്യ ജംബോസര്‍വീസ്  ഡിസംബര്‍ 25 മുതല്‍

മലപ്പുറം: എയര്‍ ഇന്ത്യയുടെ ജിദ്ദ- കോഴിക്കോട് ജംബോ വിമാന സര്‍വീസ് ഡിസംബറില്‍ 25-ന് ആരംഭിക്കും. 24-ന് രാത്രി 11.05-ന് ജിദ്ദയില്‍നിന്ന് പുറപ്പെടുന്ന ജംബോ വിമാനം 25-ന് രാവിലെ 7.30-ന് കോഴിക്കോട്ടെത്തും. അടുത്തയാഴ്ച മുതല്‍ ടിക്കറ്റ് ബുക്കിങ് ആരംഭിക്കാന്‍ എയര്‍ ഇന്ത്യ ശ്രമം തുടങ്ങി.
ഡല്‍ഹിയില്‍നിന്നും കോഴിക്കോട്ടെത്തി ജിദ്ദയ്ക്കുപറക്കുന്ന നിലയിലായിരിക്കും വിമാനത്തിന്റെ മടക്കം. യൂറോപ്യന്‍ മേഖലയിലേക്ക് സര്‍വീസ് നടത്തുന്ന ജംബോ വിമാനം കോഴിക്കോട്- ജിദ്ദ മേഖലയിലേക്ക് കൂടി ഉപയോഗപ്പെടുത്താനാണ് അധികൃതരുടെ ശ്രമം.
കരിപ്പൂരില്‍ ജിദ്ദ യാത്രക്കാരെ ഇറക്കിയശേഷം, വിമാനം ഡല്‍ഹിയിലേക്ക് സര്‍വീസ് നടത്താനാണ് പുതിയനീക്കം. നേരിട്ടുള്ള കോഴിക്കോട്-ഡല്‍ഹി സര്‍വീസിന് ശരാശരി 3.1 മണിക്കൂര്‍ സമയമെടുക്കും. ഇങ്ങനെവരുമ്പോള്‍ ഏഴുമണിക്കൂര്‍ പറക്കാനും അതുവഴി വലിയ പാര്‍ക്കിങ് ചാര്‍ജ് ഒഴിവാക്കാനും എയര്‍ ഇന്ത്യക്ക് സാധിക്കും’
രാവിലെ 11-ന് ഡല്‍ഹിയില്‍ എത്തുന്ന വിമാനം വൈകുന്നേരം അഞ്ചിന് ഡല്‍ഹി – ജിദ്ദ, ഡല്‍ഹി-കോഴിക്കോട് യാത്രക്കാരുമായി കോഴിക്കോട്ട് എത്തും, കരിപ്പൂരില്‍നിന്ന് ജിദ്ദയിലേക്കുള്ള യാത്രക്കാരെയും കയറ്റി വൈകുന്നേരം 6.30-ന് ജിദ്ദയിലേക്ക് പുറപ്പെടും,
ജിദ്ദ- കോഴിക്കോട്- ഡല്‍ഹി, ഡല്‍ഹി- കോഴിക്കോട് – ജിദ്ദ മേഖലയില്‍ നേരിട്ടുള്ള എയര്‍ ഇന്ത്യയുടെ ബോയിങ് 747-400 സര്‍വീസാവും ഇത്. ഡല്‍ഹി – കോഴിക്കോട് മേഖലയില്‍ ഒരു നോണ്‍ സ്റ്റോപ്പ് സര്‍വീസ് കൂടി ഇതുവഴി ലഭ്യമാവും. നിലവില്‍ എയര്‍ ഇന്ത്യക്ക് മാത്രമാണ് ഒരേ ഒരു ഡല്‍ഹി-കോഴിക്കോട് നോണ്‍സ്റ്റോപ്പ് സര്‍വീസുള്ളത്.

Sharing is caring!