മുനവ്വറലി തങ്ങളുടെ മൈ ബിലവ്ഡ് ബാപ്പ പ്രകാശനം ചെയ്തു
ഷാര്‍ജ: പാണക്കാട് സയ്യിദ് മുഹമ്മദലി ശിഹാബ് തങ്ങളുടെ ജീവിത ഗന്ധിയായ ഓര്‍മ്മകള്‍, ലേഖനങ്ങള്‍, നിലപാടുകള്‍, എന്നിവ കോര്‍ത്തിണക്കി സയ്യിദ് മുനവ്വര്‍ അലി ശിഹാബ് തങ്ങള്‍ എഴുതിയ പ്രിയപ്പെട്ട ബാപ്പ എന്ന പുസ്തകത്തിന്റെ ഇംഗ്ലീഷ് പതിപ്പ് പ്രകാശനം ചെയ്തു.
ഷാര്‍ജ അന്താരാഷ്ട്ര പുസ്തകോത്തവത്തില്‍ യു.എ.ഇ പ്രസിഡന്റിന്റെ മതകാര്യ ഉപദേഷ്ടാവ് സയ്യിദ് അബ്ദുറഹ്മാന്‍ അലി അല്‍ ഹാശിമി മലയാളത്തിന്റെ പ്രിയ ഗ്രന്ഥകാരന്‍ ടി.പത്മനാഭന് കോപ്പി നല്‍കിയാണ് പ്രകാശനം ചെയ്തത്. ഡോ. എം.കെ. മുനീര്‍ അധ്യക്ഷത വഹിച്ചു. കൊണ്ടോട്ടി ഗവ. കോളേജ് ഇംഗ്ലീഷ് വിഭാഗം അസി. പ്രൊഫസറായ ഡോ. ആ ബിദ ഫാറൂഖിയാണ് പുസ്തകത്തിന്റെ പരിഭാഷ തയ്യാറാക്കിയത്.
പുസ്തകോത്സവത്തില്‍ തിങ്ങിനിറഞ്ഞ പ്രധാന വേദിയായ ബാള്‍ ഹാളില്‍ വെച്ചാണ് ചടങ്ങ് നടന്നത്.
പാണക്കാട് സയ്യിദ് മുഹമ്മദലി ശിഹാബ് തങ്ങള്‍ കേരളത്തിന്റെ മാത്രം നേതാവല്ലെന്നും ആഗോള തലത്തില്‍ ശ്രദ്ധേയമായ നിലപാടുള്ള ലോകോത്തര നേതാവായിരുന്നെന്നും പ്രകാശനം നിര്‍വ്വഹിച്ചുകൊണ്ട് അലി അല്‍ ഹാശിമി പറഞ്ഞു. അദ്ദേഹത്തിന്റെ വ്യക്തി മാഹാത്മ്യം എക്കാലത്തും ഓര്‍മിക്കപ്പെടുമെന്നും നന്മയും സ്‌നേഹവും കരുതലായി സൂക്ഷിച്ച ജനനേതാവായിരുന്നു അദ്ദേഹമെന്നും ഹാശിമി വ്യക്തമാക്കി.
അപൂര്‍വം ആളുകളെ മാത്രമേ ഞാന്‍ അങ്ങോട്ട് പോയി കാണാന്‍ ആഗ്രഹിച്ചിട്ടുള്ളു. അതിലൊരാളാണ് ശിഹാബ് തങ്ങളെന്ന് കഥാകൃത്ത് ടി. പത്മനാഭന് പറഞ്ഞു.
ജീവിച്ചിരിക്കെ കൂടിക്കാഴ്ച നടന്നിട്ടില്ല. എന്നാല്‍ മരണ വിവരം അറിഞ്ഞ ഉടനെ പാണക്കാട്ടേക്ക് പുറപ്പെട്ടെന്നും ശിഹാബ് തങ്ങളുടെ കുടുംബത്തെ ആശ്വസിപ്പിച്ചെന്നും, പത്മനാഭന് ഓര്‍മ്മകള്‍ പങ്ക് വെച്ചു.
മലയാളത്തിന്റെ അതിരുകള്‍ക്കപ്പുറത്തേക്ക് പടര്‍ന്ന് കിടക്കുന്ന ശിഹാബ് തങ്ങളുടെ അപൂര്‍വ വ്യക്തിത്വത്തിന്റെ പ്രകാശനം കൂടിയായിരുന്നു ചടങ്ങ്. ഒലിവ് പബ്ലിക്കേഷനാണ് പുസ്തകം പ്രസിദ്ധീകരിച്ചത്. ഷാര്‍ജ പുസ്തകോത്സവത്തില്‍ തുടര്‍ച്ചയായി മൂന്നാം വര്‍ഷവും ശിഹാബ് തങ്ങളെക്കുറിച്ചുള്ള പുസ്തകത്തിന്റെ പ്രകാശനം നടന്നത് അപൂര്‍വ്വതയായി. നുറുകണക്കിനാളുകളാണ് വിവിധ രാജ്യങ്ങളില്‍ നിന്നും എമിറേറ്റ്‌സുകളില്‍ നിന്നുമായി ചടങ്ങിനെത്തിയത്.
ഷാര്‍ജ മീഡിയ കൗണ്‍സില്‍ ചെയര്‍മാന്‍ ശൈഖ് സുല്‍ത്താന്‍ ബിന്‍ അഹ്മദ് അല്‍ ഖാസിമി, ഇബ്‌റാഹീം അല്‍ അബിദ് എന്നിവര്‍ ശൈഖ് സായിദ്, സി.എച്ച് മുഹമ്മദ് കോയ എന്നിവരെ കുറിച്ചുള്ള പുസ്തകങ്ങളുടെ പ്രകാശനവും നിര്‍വ്വഹിച്ചു.
ഷഹനാസ് തയ്യാറാക്കിയ കലിഡോസ്‌കോപ് എന്ന പുസ്തകത്തിന്റെ അറബി പരിഭാഷ അല്‍ മശാകില്‍ എന്ന ഗ്രന്ഥവും ചടങ്ങില്‍ പ്രകാശനം ചെയ്തു. സംവിധായകന്‍ നിഷാദ് ഏറ്റുവാങ്ങി.
കെ.എം.സി.സി നേതാക്കളായ ശംസുദ്ധീന്‍ ബിന്‍ മുഹയുദ്ദീന്‍, ഡോ. പുത്തൂര്‍ റഹ്മാന്‍, അന്‍വര്‍ നഹ, അബ്ദുല്ല ഫാറൂഖി, കുവൈത്ത്, കാനഡ, മലേഷ്യ എന്നിവിടങ്ങളിലെ കെ.എം.സി.സി. നേതാക്കള്‍, വ്യവസായ പ്രമുഖര്‍, ഉദ്യോഗസ്ഥര്‍ എന്നിവര്‍ പങ്കെടുത്തു.
RECENT NEWS
അപകടത്തിൽ മരിച്ച ബസ് ജീവനക്കാരന്റെ കുടുംബത്തിനായി സ്വകാര്യ ബസുകൾ സമാഹരിച്ചത് 18 ലക്ഷം രൂപ
പെരിന്തൽമണ്ണ: ജോലിക്കിടെ അപകടത്തിൽ മരിച്ച ബസ് ജീവനക്കാരന്റെ കുടുംബത്തെ സഹായിക്കാൻ സ്വകാര്യ ബസുകൾ കാരുണ്യയാത്ര നടത്തി സമാഹരിച്ചത് 17,98,155 രൂപ. കൊളത്തൂർ ഓണപ്പുട സ്വദേശി മൻസൂറിന്റെ ഭാര്യയും വിദ്യാർഥികളായ 2 കുട്ടികളും ഉൾപ്പെട്ട നിർധന കുടുംബത്തെ [...]
